ލިޔަން ފެށުން

މި ބުލޮގު އުފެއްދުމުގެ ބޭނުމެއް ޖެހިފައިވަނީ، އަޅުގަނޑު ދެ ފޮތެއްގެ ނުފޫޒުގައި ޖެހިގެންނެވެ. އެއް ފޮތަކީ އޮސްޓިން ކްލިއޯން ލިޔުއްވާފައިވާ ‘ޝޯ ޔޯ ވަރކް’އާއި، ވިލިއަމް ޒިންސަރ ލިޔުއްވާފައިވާ ރައިޓިންގ ޓު ލަރން، މި ދެ ފޮތެވެ. ފުރަތަމަ ފޮތުގައި ބުނަނީ، ކަމެއް ބުނެދިނުމަށް މާ މޮޅު މީހަކަށްވުން މުހިއްމު ނޫންކަމެވެ. އަދި ދެވަނަ ފޮތް ބުނަނީ ލިޔުމުގެ ސަބަބުން ކަންކަން ދަސްވާނޭކަމެވެ.

އަޅުގަނޑު ވެސް ކަންކަން ދަސްކުރަން ބޭނުންވެއެވެ. މަސައްކަތުގެ ގޮތުން ގިނަ އެއްޗެހި ލިޔެ ޑޮކިއުމެންޓުކުރަންޖެހެއެވެ. މި ގޮތަށް ލިޔާއިރު ގިނަ ކަންކަން ނޭނގި ހުންނަކަން ނުވަތަ ރަނގަޅަށް ފަހުމުވެފައި ނުވާކަން ފާހަގަވެއެވެ. އެހެންކަމުން މި ހުސްކަން ފޫ ބެއްދުމަށް ލިޔަން ފެށީއެވެ.

އަނެއް ސަބަބަކީ އަޅުގަނޑުގެ ފުށުން ވެސް ބަޔަކަށް ފައިދާއެއް ވެދާނޭކަމުގެ ނިޔަތުގައި، އަޅުގަނޑު ކަންކަމުގައި ދެކޭ ގޮތްތަކާއި، ކުރާ ދިރާސާތައް ޙިއްޞާކުރުމުގެ ނިޔަތުގައެވެ.